Project Center Fontauna

Project Center Fontauna

Ils 27 da settember 2020 decidan las votantas ed ils votants dalla vischnaunca da Mustér davart il project Center Fontauna - Inovaziun, amplificaziun ed engrondiment cumplessiv. Sin questa pagina anfleis Vus las informaziuns relevantas ed il messadi davart il project.

 

 

Informaziun publica

 

 

FAQ - Damondas e rispostas

Alle Antworten einblenden
Alle Antworten ausblenden
  • Tgei parts dil center vegnan refrestgentadas, adattadas ni amplificadas?

    • La caffetaria vegn transformada en in center da visitaders e sesanfla da niev all’entrada.
    • Ell’anteriura caffetaria vegn drizzau en in local da termagliar per affons pigns.
    • Ord igl anteriur local da pumpiers dat ei in local da giugs/divertiment per giuvenils e carschi.
    • La halla da tennis survegn in niev plantschiu ed ina nova travestgida.
    • Il local da fitness mida liug e survegn finiastras.
    • La halla da reiver survegn dapli surfatscha da reiver (gallaria per ir sin terrassa vegn allontanada, stanza da sesida vegn allontanada).
    • Ei dat ina nova part per bouldrar.
    • Ei dat ina nova halla per far gimnastica (spinning, erobic, yoga etc.), ni era per seminars.
  • Daco drova ei in niev num?

    Il num actual “center da sport e cultura Disentis/Mustér” cuntegn las purschidas “sport” e “cultura”. Il concept per il futur dil center metta peisa sin las purschidas  surodinadas “sport” “recreaziun” ed “occurrenzas”. Secapescha ha era la cultura siu plaz, surtut sur il tetel dallas occurrenzas”. Denton sa il num actual buca satisfar a las pretensiuns. Aschia ei vegniu decidiu d’adattar il num cun il niev num neutral “Center Fontauna” che cuntegn en la cumparsa denton adina aunc ils cavazzins “sport – recreaziun – occurrenzas" ni per tudestg “Sport – Freizeit – Veranstaltungen". Damai che la cumparsa sto aschia ni aschia vegnir surluvrada (mira proxim punct) caschuna la midada dil num buca pli gronds cuosts supplementars.

  • Dat ei gia in niev logo?

    In niev logo dat ei aunc buc. Il logo sin las visualisaziuns ei semplamein per visualisar co ins vul dar dapli preschientscha visuala al Center Fontauna. Il logo vegn elaboraus pér suenter la votaziun, buca sco davos era perquei ch’il cantun pretenda che la marca «Grischun» vegn applicada. Quei ei ina dallas pretensiuns colligiadas cun il milliun per infrastructura turistica relevanta per il sistem ch’il cantun ha concediu a fonds perdu.

  • Daco ei la Caffetaria aschi gronda?

    Nus discurrin buca pli d’ina caffetaria, mobein d’in center da visitaders. Quei center da visitaders ha in tschuat funcziuns sco gia ussa. Aschia duei quei dar leu informaziuns da tut gener, la pusseivladad d’affitar material da sport, annunzia e cassa pils differents sports e purschidas e liug per ina pintga consumaziun. Magari dat ei era gruppas pintgas che fan in trenament duront entgins dis e vulan pensiun cumpleina. La situaziun da plaz actuala corrispunda buca a tut quels basegns aschia che quella vegn cul niev local ademplida. Il center da visitaders sa era vegnir schaus a tscheins per occurrenzas.

  • Daco drova ei ina cuschina professiunala el center da visitaders?

    Ei dat adina puspei uniuns, denton era gruppas, che vulan magliar duront in trenament ni duront in camp da trenament el center. Tier gruppas da tochen 40 persunas sa vegnir spargnau persunal sch’ins sa alimentar quellas persunas el center da visitaders e buca en Sala Fontauna. Da l’autra vart sa quella cuschina era vegnir duvrada per occurrenzas pli grondas che drovan sin quell’alzada certa infrastructura da cuschina (congress etc.). La cuschina ei denton buca surdimensiunada ella ei sulet in tec pli gronda che la cuschina actuala ed ademplescha aschia era las perscripziuns da higiena (sparter la part da lavar giu vischala culla part da cuschinar).

  • Daco dat ei negina halla da squash?

    La halla da squash ei vegnida strihada per spargnar cuosts. Vitier vegn ch’il sport da squash ei tenor statisticas svizras buc in sport che crescha.

  • Daco dat ei buc in iral da bowling?

    La stanza da giugs (anteriur local da pumpiers) nua ch’ei era ina gada previu dus irals da bowling vegn endrizzada aschia ch’ella sa era vegnir duvrada per auters intents. Ils irals da bowling impedessan in tal nez. Vidlunder vegn ch’ils irals havessan buca la lunghezia standardisada. Ina part davos digl anteriur local da pumpiers vegn duvrada per installar la ventilaziun dil center da visitaders ed aschia ei la surfatscha che resta pli pintga.

  • Tgei purschidas ein novas? Tgei dat ei dapli?

    • Halla da bouldrar: actual ei quei mo ina preit improvisada
    • Halla da reiver: quella survegn prest il dubel surfatscha da reiver. Quei dat era la pusseivladad d’organisar campiunadis a Mustér.
    • Nova halla multifuncziunala: sa vegnir duvrada per gimnastica per ex. per aerobic, yoga, spinning etc.). La halla ei en in meglier liug ed ei ha gest dasperas garderobas.
    • Stanza da giugs per affons pigns
    • Stanza da giugs e divertiment per giuvenils e carschi
    • Local da fitness: augment da plaz e purschidas e cunzun cun finiastras.
    • Orientaziun: il Center Fontauna envida ils hosps d’entrar. Las structuras ein pli claras ed els anflan meglier las differentas purschidas.
    • Menaschi: per il menaschi sez dat ei differentas meglieraziuns quei che pertucca ils viadis e las pusseivlads da transportar d’in liug a l’auter uorden e mobiliar.
  • Co vegn ei tier ina summa d’amortisaziun per la vischnaunca da “sulettamein” 5.89 miliuns francs?

    L’investiziun previda munta a 10,6 milliuns francs, la summa che resta d’amortisar sur 33 onns ei denton mo 5,89 milliuns francs. La differenza resulta per dus motivs. D’in maun vegnan 1,91 milliuns francs finanziai entras tiarzs (1,0 milliuns francs dil cantun, 0,46 milliuns francs entras PSG e 0,45 milliuns francs entras la restituziun dalla taglia sin plivaleta). Da l’autra vart ha la vischnaunca gia fatg remessas da 2,8 milliuns francs pil CSC. Omisdus facturs reduceschan la summa che sto vegnir amortisada ils proxims 33 onns aschia ch’ei resta 5,89 milliuns francs respectiv 55% dall’entira investiziun.

  • Daco quella restituziun da la TPV?

    Tut ils quens da mistergners e purschiders da survetschs vegnan facturai cun quintar vidlunder 7.7% TPV. Quella taglia sin plivaleta vegn restituida ad ina fatschenta che fa sviultas ch’ein suttamessas alla TPV. Contribuziuns dil maun public ein buca sviulta ed aschia vegn la taglia buca restituida cumpleinamein.

  • Daco ei la halla treidubla da sport buc ell’emprema etappa?

    La halla da sport ei en in bien stan. La substanza da quella ei buna. Ils urdeins fix da sport (ed era ils auters) vegnan controllai periodicamein entras ina fatschenta specialisada aschia che la segirtad ei garantida per las sportistas ed ils sportists. Il pon acustic che sesligia davos il tablegiau e croda magari en halla sch’ei vegn tratg ina balla encunter quel, ei gleiti svanius cumplet. Il CSC ha schau far ina mesiraziun ed analisa sche la tocca da quella «teila» che croda en halla ei nuscheivla. Il material sez cuntegn negins elements nuscheivels era la puorla che savess seresultar cun il sesligiar da quei pon acustic ei buca nuscheivla per sportistas e sportists. Aschia ei quei buca in problem per la sanadad ed igl ei buca urgent da sanar quellas preits. Cunquei han ins saviu decider da metter quella pat dil project en ina secunda etappa.

  • Dat ei el futur in accumpignament (instructur) pil center da fitness?

    Quei tema ei buca pér cun quei project sin meisa tier il Center da sport e cultura. La problematica ei ch’igl ei buca aschi sempel d’anflar zatgi che fa quei sin damonda, ni a temps parzial. Ei vegn denton teniu en egl quei tema per anflar ina sligiaziun.

Center da sport e cultura l CH-7180 Disentis/Mustér | Fon +41(0)81 947 44 34
E-Mail l Impressum l Datenschutz